Sentyabrın 15-də Akademik Milli Dram Teatrında “Qarabağnamə” tamaşası ilə yeni teatr mövsümünün açılışı olub. Xalq yazıçısı İlyas Əfəndiyevin “Hökmdar və qızı” pyesi əsasında hazırlanmış tamaşanın nümayişindən əvvəl Akademik Milli Dram Teatrının Bədii rəhbəri, Əməkdar incəsənət xadimi Mehriban Ələkbərzadə kollektivi və tamaşaçıları yeni mövsüm münasibəti ilə təbrik edib, teatrın yaradıcılıq planları haqqında danışıb.
Qeyd olunub ki, ənənəvi olaraq Akademik Milli Dram Teatrında mövsümün açılış və bağlanış mərasimləri “Qarabağnamə” tamaşası ilə olur: “”Qarabağ Azərbaycandır və Nida” bizim şüarımız, hədəfimiz və məsləyimizdir. Deməli, hər zaman belə olacaq. Hər dəfə “Qarabağnamə” tamaşası ilə bu fikri bir daha təsdiq edəcək, amalımızı bir daha bəyan edəcəyik”.
Mehriban Ələkbərzadə əlavə edib ki, növbəti teatr mövsümünün açılışında “Qarabağnamə” tamaşası yeni quruluşda təqdim olunacaq.
Bu ilin dekabrın sonuna qədər isə üç yeni tamaşanın premyerası keçiriləcək. Bunlar “Dantenin yubileyi”, “Sənsiz” və “Əsrə bərabər Gün” tamaşalarıdır.
Daha sonra Xalq artisti Nurəddin Mehdixanlı çıxış edib, yeni mövsüm münasibəti ilə fikirlərini bölüşüb, təbriklərini çatdırıb: “Biz qalib ölkənin sənət adamlarıyıq. Bu səhnədə qələbəmiz, ordumuz, qəhrəmanlarımızla bağlı əsərləri oynayacaq, sizi bu tamaşalara dəvət edəcəyik. Nə yaxşı ki, gəlmisiniz, nə yaxşı ki, bizimləsiniz. Teatr bir millətin mədəni səviyyəsinin göstəricisidir”.
Açılış mərasimində teatrın məşhur simaları – Xalq artistləri Bəsti Cəfərova, Zemfira Nərimanova, Məleykə Əsədova, əməkdar artistlər Abbas Qəhrəmanov və Anar Heybətov iştirak ediblər.
Quruluşçu rejissoru Xalq artisti Mərahim Fərzəlibəyovun olduğu tamaşada XVIII əsrdə Qarabağ xanlığının mərkəzi olan Şuşada baş vermiş tarixi hadisələrdən və Qarabağ hökmdarı İbrahim xanın ictimai-siyasi, ailə həyatından bəhs olunur.
Tamaşada rolları Xalq artistləri Kazım Abdullayev, Firəngiz Mütəllimova, Rafiq Əzimov, Hacı İsmayılov, Əli Nurzadə, əməkdar artistlər Elşən Rüstəmov, Məsmə Ağaverdiyeva, Kazım Həsənquliyev, Elxan Quliyev, Aslan Şirin, Elnar Qarayev, Əminə Babayeva, aktyorlar İlyas Əhmədov, Ramin Şıxəliyev, Ləman İmanova, Cavidan Novruz, Firuzə Balayeva, Nəzrin Abdullayeva, Məhsəti Tahirzadə, Elsevər Rəhimov və Tural İbrahimov ifa edib.
Səhnə əsərinin quruluşçu rəssamı İsmayıl Məmmədov, geyim rəssamı Aygün Mahmudova, işıq üzrə rəssamı Rafael Həsənov, musiqi tərtibatçısı Həmid Kazımzadədir.
Tamaşada Xalq artistləri Polad Bülbüloğlu və Vasif Adıgözəlovun əsərlərindən istifadə olunub.
Qeyd edək ki, İlyas Əfəndiyevin “Hökmdar və qızı” əsəri əsasında tamaşa ilk dəfə 1996-cı ildə nümayiş olunub. Tamaşa böyük müvəffəqiyyət qazanıb və 1997-ci il sentyabrın 20-də ümummilli lider Heydər Əliyev Milli Dram Teatrının səhnəsində tamaşanı maraqla izləyib. Tamaşaya baxdıqdan sonra yaradıcı heyətlə görüşdə Heydər Əliyev əsəri yüksək qiymətləndirib, onun təbliğinin vacibliyini bildirib.
