Akademik Milli Dram Teatrının Novruz tamaşası uğurla nümayiş olunur

Akademik Milli Dram Teatrı Novruz bayramı günlərində azyaşlı tamaşaçılar üçün “Gəl baharım, gəl yazım” tamaşasını təqdim edir. Teatrın mətbuat xidmətindən verilən məlumata görə, səhnə əsəri Xanım Həsənovanın eyniadlı əsəri əsasında hazırlanıb.

Səhnə əsərinin rejissoru Anar Babalı, rəssamı əməkdar mədəniyyət işçisi İlham Elxanoğlu, rəqslərin quruluşçusu Lalə Hacıyeva, rejissor assistenti Könül Kərimovadır.

Uşaqların marağına səbəb olaraq onları əyləndirən rəngarəng tərtibatlı tamaşada aktyor Ramin Şıxəliyev və Vüsal Xalıqoğlu (Kosa), Cümşüd Zeynalov və Vüsal Mustafayev (Keçəl), Rəşad Bəxtiyarov və Mehman

Fətullayev (Xan Çoban), əməkdar artistlər Mehriban Xanlarova (Əkinçi), Mirzə Ağabəyli (Bağban), aktyor Rüstəm Rüstəmov (Bağban), aktrisalar Şəhla Əliqızı və Rada Nəsibova (Bahar), Firuzə Balayeva və Xədicə Novruzlu (Qış), Ceyran Baxışova (Buz), Sona Novruzova (Qar), Əlləz Əhmədov (Çovğun), Əminə Cəfərova (Boran), Ləman Fərmanlı (Su çərşənbəsi), Fərid Vəliyev (Od çərşənbəsi), Mehin Məmmədli (Yel çərşənbəsi), Nəzrin Əsgərzadə (Torpaq çərşənbəsi) iştirak edir.

Səhnə əsərinin süjet xətti belədir: Xan çoban, əkinçi və bağban qışın gec getməyindən narazıdırlar. Onlar bir yerdə Baharın üstünə şikayətə gedirlər. Bahar onları diqqətlə dinləyir və çərşənbələri qışın üstünə göndərir. Gərgin mübarizədən sonra Xan çoban, əkinçi və bağbanın arzusu yerinə yetir.

Tamaşa gündə dörd seans olmaqla saat 11:00, 13:00, 15:00 və 17:00-da təqdim olunur.

Şərh yaz